Ampi ino mu embuwi eya Olusuba. Turi no okuganya mbwe Omwami Katonda aaza okuku-aa amaani no owusiza owua okuigerera amang'ana amayia amangi kandi amalootu agaaza okugera no omwoyo gwao guwa no owuolu no ogasoma lwona ooza okuwona ewiruuzia, okuwarra no okutegerezia amng'ana aga Omwami Katonda. Lwona rino ni iwaga ilootu ino eria oesa okusoma eminayo kiomo oguwoola aa Awasuba waema, Endagano Empia eya Olusuba, ekiiruuzia ekia Yesu, enyembo ezia Awasuba, engerera ezigauke-gauke, eminayo emilootu egia Awasuba alala ne ewintu windi wiona ewingi kandi ewilootu.
Wano na awagaaka alala na awakungu awatunzia mu emirimo egia okunogerezia Endagano eya Olusuba.
Wamwifu Jeremiah Okumu, Boniface Msaswa ni Jael Obonyo ni wawarra ebuuki eya Emfumo.
Paulus, Jael ni Samwel awandi ku awakozi awa Suba BTL Project.
Aa Awasuba Waaema
Elijah Abiri
Awasuba waema Euganda ni waaza aa wamenyere nyingeeno. Olumbe olwa omwami Junju nilwo olwagera Awakunta ni warumuka okwema Euganda ni waaza aa wari nyingeeno. Ivuang’ano waazra muwuato owua awakwe waawu Awawaare. Wano waawanga Witewe ni awamunyumba yaae ni Kiboye wamwau waae owaita omwami Junju. Olwa waatuuka kwi Ivwang'ano wagowera kumwalo ogwa Ekiteenyi.
Nikwemao watembula omugizi gwawu Emauta ni Kiboye iye yaemao agia okumenya Ewuigasi. Olwa yatuuka Ewuigasi, yagowera Ekisegi. Nikwemao yawona eriosi ni rivunda mukigiri ekia Awiregi aa yatuukra omugaaka owa omukazi waae yafwa. Kiboye yaa-amba owuiko no omuntu oyo nawuno wawurizania ni Kiboye mbwe Kiboye atoole omwala waae awe omukazi waae. Olwa waamala okuwurzania, Kiboye yareetra wamwawu waae Witewe amang'ana kiomo atuukiire omwala owa aagala okukwa kugere amusuwre emiandu. Witewe yoona olwa yawurra amang'ana aga wamwawu ago, yaganya.
Kuwiriango ewia ema Euganda awalonda Awakunta ni Awakinga. Ono yawanga omugaaka Mwembe na awamunyumba yaae. Wano woona waazra muwuato kiomo Witewe na awamunyumba yaae niwalonda olunyafwa lwawu kandi woona waaza wagowera Ekiteenyi. Ekiagera ni Awakinga woona ni warumuka, ni okulawira okwa walawira ekiti kiawu ekia eng'oma aa Witewe olwa waagenda okuwaworra kiema awaawu Junju waazanga okuwaita. Olwa waawurra mbwe awaawu Junju waatuukiire ekiti kiawu ekia eng'oma aa Witewe kandi Awakinga niwo wawanganga ni wakuba eng'oma eyo, wamanya mbwe niwo awalagre Kiboye ni wamwawu waae Witewe mbwe wasomoke. Kutio owuti wuawamba Awakinga waingirizia mbwe woona waaza okwitwa na awaawu Junju. Waatuukra owuato owuire wafuma ni walonda Witewe na awantu waae.
Nikwemao Awawaare woona waafuma okulonda olunyafwa olwa omugoogo waawu Nyambaya muka Witewe. Waaingira mumaato gaawu wavuga nauno waatuuka Kusigulu, nikwo waezera. Ni waema ao katio waaza watuuka Ewusawakwa. Olwa waema ao katio waaza watuuka Eluzinga aa waatembula emigizi giawu na awandi woona waaza wamenya Ivwang'ano.
Olwa wano waaza, waatuukra ewiriango windi wiona ni wimiire okumenya Ivwang'ano.Wino wiawanga ewiriango ewifwana, Awisokolwa, Awasaamo, Awagimbe, Awakiimba na Awiramba. Awisokolwa woona waema Euganda kandi waaza kia awavuwi. Awasaamo iwo waema Esaamia kandi woona waawanga awavuwi awaagenda-genda mumialo ni wavuwa. Emvwa ziawanga okuria okukaate okwa Awasuba. Awagimbe woona waema Euganda kandi waaza watuukra owumenyo wuawu Kwigulwe ne enganda zindi nizikiari okuuza Ivwang'ano. Awakimba na Awiramba woona guukwa waawu Luwaare yaema Euganda. Luwaare yaema Euganda na awiina waae ni waaza okureeta owukeke okufwania emere no omuunyu ogwa ekisari Eukisingri. Olwa waatuuka kunyanza, enda yatanika okuluma-luma Luwaare nauno waaza ma awiina waae wamugowia Emasisi wamukumra omurro okuuza okumuwitira ni wairana. Ano nio Ng'una Omwisokolwa yamutuukra amutoola awa omuzia waae amukwerezia. Okwemra ao, Awisokolwa na awada awa Awiramba na Awakiimba awatakwezana.
Awakune iwo waaema Tanganyiika asi aaetwa mbwe Rienyi Kowuoyo. Guukwa waawu Murianyi ni Kigunga wamwawu waae waawanga awavuwi awamenyere ampi ne enyanza. Owuire wulala Isamba-samba riagombaka nawo, waizukira ni wari kuwuziwa kungulu. Omuyaaga gwawareeta mpola-mpola nauno guuza guwagowia Ekiseegi. Awantu wano waatanika okugenda-genda ni wagaala asi aa waesanga okumenya geeza. Waaza watuuka Mungeri, kugia Iragwe, nauno waatuuka Eukisingiri. Murianyi na awantu waae iye wasigala Eukisingiri. Ni wamwawu waae Kigunga iye yagia emberi atuuka Gembe. Kino nikio ekietwa mbwe Eukigunga.
Ewiriango windi ewia Awasuba ewisigaale, wiagia wimenya muwialo windi ne ewizinga ewigawukaane-gawukaane kiomo Engooze, Kiwua, Kwiremba, Kwiringiti, Kwitakawiri ni Kibuogi na awandi woona watanyika wagia muwialo windi ewifwana Awendo, Emuhulu, Ewuigase, Suuna, Mululambwe ne ewialo windi ewisigaale. Ekiagera ni watanyika otio no olumbe olwa endoolo olwa waitanga ino.
Kutio Awasuba wari awantu awangi ino kandi wa-ambre ekialo ekikaate. Awasuba na awantu awagezi kandi awasiani awamanyikaane ino.
Wuno mala no owutanikro owua ekiiruuzia ekia Yesu. Kutio oingiziiwue kugere owarre ekiiruuzia ekia Yesu kiona kandi Katonda akusereke ino.(Igulao asi ano no oagala okukiwarra kiona.)
Ono ni wamwifu Naphtaly Mattah omulala ku awakongo awaatanika emirimo egia okugalusia Endagano mu Olusuba. Ano ari enze eya ofiisi eya Suba BTL Project alala na awayaanzi awaemere mu amakaniisa egia Awasuba.
Epiicha eri entulo eno no owutanikro owua Apirima eya Olusuba. Kutio no oagala okugisoma ku owuliire, igulao asi ano kugere oigerere kandi osome amang'ana amangi agari munsi.
Wano na awagaaka na awakungu awa Katonda yaeta kugere watunzie mu emirimo egia okunogerezia Endagano eya Olusuba. Ano wari enze eya ofiisi eya Suba BTL Project alala na awagalusi awa Endagano.
Guno no omunayo ogwa Noowa ogutorre mu Endagano. Omunayo guno guri ne engerera enyingi kiomo awantu waalowa okuwurra amang'ana aga Omwami Katonda. Igulao asi ano no oagala amangi.
Awavuwi ni wagowa ku ensanyaata no owuato wuawu ni waema okuvuwa. Ivuwa ne endala ku emirimo egia Awasuba wangi wakola kugere watukire amasendi. Ne emirimo egiakolwanga okuemera kale, ni gikiakolwa nawuno reero.
Awavuwi waitire emvwa enyingi mu eriimba, kandi katio wazifumia kugere wagie waziguzie.
Eno ne endala ku engira ezia Awasuba wakola nayo mu okuwunguka agati eya Ivuang'ano ni Mumbita.
